Nora magiging abala sa harap at likod ng kamera

Mula sa pahayagang Aksyon

WHAT’S THE POINT?

Pilar Mateo

 ANG Tawi-Tawi ay isang island province na kabilang sa ARMM (Autonomous Region in Muslim Mindanao).  At ang capital nito ay Bongao.  Nasa Southernmost part ito ng ating bansa sharing sea borders with the Malaysian State of Sabah and the Indonesian East Kalimantan province.

Sa Northeast naman matatagpuan ang Sulu at sa West side ay ang Sabah ng Malaysia. Sabi rin sa Wikipedia, Tawi-Tawi also covers some island in the Sulu Sea to the northwest, the Cagayan de Tawi-Tawi Island and the Turtle Islands na beinte kilometro ang layo mula sa Sabah.

Mula April 14 (Sabado) hanggang katapusan ng buwan, ‘yun ang magiging location ng pelikulang gagawin ni Brillante ‘Dante’ Mendoza na may pamagat na “The Womb!”

At ito rin ang unang full-length film na sasalangan ng nag-iisang Superstar na si Nora Aunor kung saan makakasama niya sina Lovi Poe, Bembol Roco at Mercedes Cabral.

Ito ang ibinalita ng representative ng TV5 (na siyang manager ng Superstar) na si Noel Ferrer sa idinaos na reunion ng mga tagahanga ng Superstar sa 8th floor ng Aberdeen Court (Great Eastern  Hotel na) noong Lunes ng hapon -- bilang pag-welcome din sa NOW (Noranians Worldwide).

Dumalo rito ang apat na pinakamalalaking liga ng mga tagahanga ng Superstar -- ang Federacion, Solid Group, GANAP at ICON.

Dito na rin ipinagkaloob sa Superstar ang mga hindi niya personal na natanggap na mga pagkilala mula sa PASADO.

Long-overdue na ang nasabing pagkikita-kita.  Kaya bago tumungo ang grupo sa Tawi-Tawi, nagbigay na ng kanyang panahon ang Superstar para makapiling ang may halos dalawandaang mga tagahanga niyang nagsama-sama roon that afternoon.

Nagpa-raffle ng cash at mga appliances ang Superstar.  Nagkaroon naman ng mga production numbers nila ang bawat grupo.  At inasikaso itong lahat ng international coordinator ng Noranians sa buong bansa at buong mundo na sina Albert Sunga at Edgar Castro.

Present din sa nasabing reunion ang kelanman eh, hindi na mawawala sa tabi ng Superstar, ang Master Showman na si Kuya Germs (German Moreno), sina Joanne Banaga at Sir Perci Intalan ng TV5, ang best friend ng Superstar na si Manay Glenda Kennedy, mga anak na sina Matet at Kenneth at ang anak-anakan ng Superstar na si Edgar Allan Guzman.

* * *

MARAMI na nga ang naiinip sa pagsisimula ng magiging mga trabaho ng Superstar sa kanyang tatlong taong kontrata with TV5. 

Ayon sa spokesperson ng TV5 for the Superstar na si Noel, habang hindi pa nagsisimula ang mauuna nitong pelikula sa bakuran ng Kapatid, may mga plinano munang proyekto ang Superstar bilang isa sa maituturing na may malaking impluwensya sa mga tao.

Uunahin na nga ang “The Womb” na pinayagan ng TV5.  At dito, ayon na rin sa inilahad ni Noel, walang script na tatanganan ang mga artista sa kanilang pagtatrabaho.  

Magre-react sila sa mga sitwasyon na sasalangan nila sa harap ng camera.  Na in a way, masasabing experimental, dahil ito ang isasagawa ni Direk Brillante.

Kaya, the scenes would be mostly a cut from real life.  At ang magiging suporta nila eh, ang mga Badjao sa Tawi-Tawi. 

Sa pagbabalik ng Superstar mula sa kanyang trabaho sa pelikula, sasalang ito sa grand finals ng “Talentadong Pinoy” bilang judge sa May 5 and 6 sa Amoranto Stadium. 

Magkakaroon uli siya ng break para tumungong muli sa Boston, Massachusetts para sa kanyang check-up with her throat doctor at therapy na rin. 

At bilang paghahanda sa kanyang kaarawan (May 21) at sa selebrasyon na rin ng kanyang ika-45 na taon sa industriya, isang seminar ang gusto nitong isagawa para sa lahat ng manunulat, kung saan gagawa ang bawat isa ng profile o feature nila sa Superstar, mula sa gagawing no-holds barred interview dito.

At ito naman daw ang magbibigay ng Press Awards sa puntong ‘yun.  Meron din siyang plano para naman sa mga photographers sa Camera Club of the Philippines. 

Ang magiging culmination nito eh, isang aklat, bukod pa sa ginagawa na ng premyadong scriptwriter na si Ricky Lee na talambuhay ng Superstar.  Naririyan din ang pagse-celebrate ng thirty years ng “Himala” at ito naman eh, isasagawa sa pakikipag-ugnayan sa gobernadora ng Ilocos Norte na si Imee Marcos. 

Kung may tahanan na ang memorabilia ng Superstar sa kanyang bayan sa Iriga, maglalagay din sila ng tahanan nito dito sa Maynila.  At sisimulan din nito ang kanyang Isang Tinig Foundation. 

Napabalita na ang magiging suporta niya sa mga dulang itatanghal very soon -- ang “Bona” (na tatampukan ni Eugene Domingo) at ang “Bakit Bughaw ang Langit” (na tatampukan ni Edgar Allan at Katherine Luna).

At naghahanap ang Superstar ng isa pang proyektong isasadula sa entablado na siya na uli mismo ang gaganap. 

Dagdag ni Noel, “Everything is a work in progress”.

Kung masusunod ang time-table na inilaan para sa lahat ng ito, walang magiging bulilyaso -- maraming magagawa ang Superstar in front and behind the cameras!