Pacman may ibang motibo ang pagbabait-baitan

Mula sa pahayagang Aksyon

Chizbiz

Ni Erlinda Rapadas

NANG magsimulang magbago at bumaling sa biblia ang Pambansang Kamao na si Manny Pacquiao at mahirang na Bible Ambassador, marami ang nagduda at hindi ganap na makumbinse na iniwan na niya nang tuluyan ng kanyang dating bisyo.

May iba raw motibo si Pacman kaya bait-baitan ang image niya ngayon.  Pinaghahandaan na raw nito ang pagtakbo sa mas mataas na posisyon sa darating na eleksyon sa 2013.

Pero sa halip na mapikon, magalit at manumbat ay nagpakahinahon si Rep. Manny Pacquiao sa mga banat sa kanya ng mga detractor.

Bahagi lang daw ito ng pagsubok sa kanyang katatagan at pananalig sa Diyos.  Ang hindi lang maintindihan ni Pacman ay kung saan ba siya lulugar ngayon?

Dati-rati, ang pagsasabong, pagbibilyar at pagiging chickboy niya ang napapansin ng lahat.  Ngayong sa bible siya bumaling at nakikinig na siya sa salita ng Diyos, ayaw pa rin paniwalaan ang pagbabago niya!

* * *

HINDI nag-denay si Michael V (aka Bitoy) nang biruin namin na siya ang highest earner among Kapuso Stars na kumita ng 65.5M noon 2011.

Basta ang naisagot lang niya ay hindi naman daw siy ganoon kayaman.  Pero aminado naman si Bitoy na walang naitatago lalo nat nakadeklara sa BIR ang lahat ng kanyang kinita.

Pero, sa dami ng malalaking product endorsements ni Michael V. hindi kataka-taka na worth millions na ang naipundar ng isang Michae V.

Sa GMA-7 na lang, two shows ang nilalabasan niya,  ang “Bubble Gang” at “Pepito Manaloto.”  Semi-regular rin siya sa “Eat Bulaga at may mga TV guesting pa.”

 May kakaibang karisma sa tao itong si Michael V. kaya in demand siya sa commercials. Tanging frustration na lamang ngayon ni Bitoy ay ang paglabas sa isang pelikula na siya ang bida.

May 3-picture contract siya sa A.P.T. Films ni Mr. Tony Tuviera (producer ng “Eat Bulaga”). Availability na lamang niya ang hinihintay ng production.

Still looking for a good project na babagay sa kanya si Michael V.  At siyempre, kailangan rin ng right timing para magklik ang pelikulang pagbibidahan niya.

Sa ngayon, ang bagong show nila ni Ogie Alcasid na “Pare & Pare” ang tinututukan muna ni Michael V.

* * *

 MALAKING leksyon ang natutunan ni Manila Vice-Mayor Isko Moreno sa naganap na hostage taking noon sa Luneta, kung saan namatay ang ilang Chinese nationals.

Kung matatandaan, isa si VM Isko Moreno sa namagitan at nakiusap sa hostage taker upang huwag ituloy ang kanyang balak.

Si VM Isko mismo ang nagtungo sa DOJ upang magawan ng aksyon ang himutok ng nasabing hostage taker.  Pero, sad to say, nauwi sa madugong enkuwentro at may mga buhay na nabuwis.

At ang nakalulungkot, isa pa si VM Isko Moreno sa nasisi sa nangyari, ganoong nagmagandang loob lang siya, upang isalba sana ang mga Chinese nationls.

Marahil, naging eye opener ito kay VM Isko Moreno.  Nag-enroll  siya ngayon sa Harvard University ng short course sa John F. Kennedy School of Goverment na tatalakay sa Leadership in Crisis Management.

Dito ay maipapaliwanag nang maayos kung papaano iha-handle ang anumang crisis sa gobyerno (tulad ng naganap na hostage taking sa Luneta).

Marahil, ayaw ng maulit muli ni VM Isko Moreno ang mga pagkakamali at kakulangan ng mga humawak sa Luneta hostage taking.  Nagpapatuloy si VM Isko Moreno sa pag-aaral at pagpapalawak ng kanyang kaalaman as a public servant.

Simula nang pasukin niya ang mundo ng pulitika ay sinikap niyang matutunan ang lahat ng dapat na gawin ng isang public servant.  Artista man siyang naturingan ay malawak naman ang kanyang kaalaman!

* * *

GRABE ang pagka-workaholic nitong si Paolo Bediones.  Wala siyang kapaguran at halos hindi na nga natutulog at nagpapahinga.  Mula umaga hanggang gabi on weekdays ay araw-araw siyang napapanood sa TV5.

Early in the morning ay nakasalang na siya sa “Good Morning Club” kasama sina Martin Andanar, Amy Perez, Cheryl Cosim, Chiqui Roa, Lourd de Veyra atbp.

Sa gabi ay anchor naman si Paolo ng late news program na “Pilipinas Balita.”  Bukod dito, tuloy pa rin ang show niya, ang “U.S.I.” (“Under Special Investigation”) at umeere na ang bagong reality show niya with Ms. Tessa Prieto Valdez and Divine Lee -- ang “Extreme Makeover Home Edition).

Layunin ng show na magbigay ng bagong bahay at bagong buhay sa deserving na mapipili upang mabigyan ng extreme makeover.

Bukod sa bahay may kasama pang kagamitan, appliances at kabuhayan (livelihood) ang masuwerteng mapipili sa “Extreme Makeover!”