Nora at Vilma sabay na lang ideklarang National Artist

Mula sa pahayagang Aksyon

Chizbiz

Ni Erlinda Rapadas

HINDI pa man nakakapili ang N.C.C.A. ng artist na pararangalan at hihiranging National Artist (for Cinema) heto at nagkakagulo, nagde-debate at kanya-kanya ng apela ang mga supporters ng Superstar na si Nora Aunor at ng Star for All Seasons na si Vilma Santos.

May kanya-kanya silang basehan kung bakit kailangan na ng kanilang idolo ang maging National Artist.  Handa nilang ipaglaban kahit saan para maibigay sa kanilang idolo ang titulo bilang National Artist.

Kung naniniwala man ang isang Congressman from Bacolod na si Nora Aunor ang deserving na tanghaling National Artist sa taong ito, ilang pulitiko rin ang nagsasabing deserve ni Batangas Governor Vilma Santos ang nasabing parangal.

Hindi rin papayag ang mga Vilmanians na mas maunang parangalan si La Aunor.  Pero, mas marami naman ang nagsasabing pinaka-deserving na tanghaling National Artist ang Comedy King na si Dolphy.

After Dolphy, naririyan pa raw si Joseph Estrada na tulad ni FPJ ay karapat-dapat din maging National Artist.

Suggestion ng ilang showbiz observers dapat ay sabay na lang na ideklarang National Artist sina Nora Aunor at Vilma Santos upang hindi maging isyu ang pilian!

* * *

SOBRANG obssessed ba sa pagpapayaman si Willie Revillame kaya wala nang pagkaawat ang kanyang pagpapalago ng kabuhayan?

Sobra-sobra na nga ito para sa kanya at sa mga mahal niya sa buhay.  At kung tutuusin, hindi na niya kailangan pang magpakaalipin pa sa trabaho at mag-suffer ang kanyang kalusugan.

Puwede na siyang mag-slow down sa trabaho, mag-relax-relax, mag-golf na lang at maglayag sa kanyang private yacht.

Pero, hindi pa tapos ang misyon ni Willie Revillame sa mga taong napapasaya at natutulungan niya thru his show “Wil Time, Big Time.”

At nakapangako rin siya sa kanyang fans abroad na dadalhin niya ang “WTBT” abroad sa U.S.A.,Canada, Australia, atbp.

Sa Mayo 28 2012 nasa Shrine Auditorium, Los Angeles, California ang tropa ni Willie R. with Mariel Rodriguez, Camille Villar, Sugar Mercado at ASF Dancers.

Sa June2 naman ay nasa Bill Graham Civic Auditorium sa San Fancisco ang “WTBT” show ni Willie R. Kasabay na ng pag-iikot na ito ng “WTBT” ang promo sa Global Network ng TV5.

* * *

HINDI pinangarap ni Ms Susan Roces ang maging bahagi ng pulitika.  May sarili siyang pamamaraan upang makatulong sa mga taong nangangailangan.

Hindi man siya natuloy na First Lady ng bansa (dahil sa pagyao ni FPJ) naging ambassadress naman siya ng Rite Med (isang linya ng gamot na gawa ng UNILAB) kung saan ang layunin ay makapagbigay sa publiko ng abot kayang gamot na mabisa sa ibat-ibang klase ng sakit.

Malaki ang concern ni Ms Susan Roces sa mga senior citizens na hindi na kumikita at umaasa na lang sa tulong ng kanilang mga anak at apo. Kaya kung may linyang “Bawal magkasakit” sagot ng Rite Med Ambassadress na si Mrs. Susan Roces Poe: "Bawal ang Mahal na Gamot."

Kailangan na pang-masa rin ang presyo!  Kaya naman nagpapasalamat ang movie queen kay Dr. Alfredo Bengzon, ang tinaguriang "Ama ng Generic Medicine," kung saan tinanggap at nakilala rin ang maraming generic na herbal medicines na mas mura sa branded na gamot.

At this point of her life, marami ang nagtitiwala kay Ms Susan Roces, kaya in demand siyang product endorser!

* * *

NGAYON pa lang, excited na raw ang mga tagahanga ni Megastar Sharon Cuneta sa Toronto, Canada dahil sa balitang magko-concert ito doon sa darating na Hunyo 9, 2012.

Ito ay bale bahagi ng pagpo-promote ng Kapatid Network dahil contract artist na nila si Shawie. Ang TV5 raw ang nag-ayos at nakipag-negotiate na gagawin ni Sharon Cuneta sa Toronto, Canada.

Malaking presscon at pagsalubong ang gagawin ng Filipino community sa pagdating ni Megastar doon ayon na rin sa kaibigang Nap Alip na naka-base na ngayon sa Toronto, Canada at nagsusulat na rin sa ilang tabloids doon.

Makakasama raw ni Shawie sa Toronto ang hunk actor na si Derek Ramsay na isa na ring contract artist ng TV5.

Mauuna naman mag-show sa Mayo sina Pops Fernandez at Martin Nievera.

* * *

MAY improvement na ang acting na ipinakita ni Kylie Padilla sa kanyang role sa “The Good Daugther.” Nabibigyan na niya ng tamang emosyon ang mala-drama niyang eksena, kumpara sa akting niya noon sa “Blusang Itim.”:

Ma-expose lang siya nang husto at mabigyan ng challenging role sa teleserye ng GMA-7 ay mas gagaling pa siyang aktres at puwede nang ipagmalaki ng kanyang Daddy Robin Padilla.

Medyo nakaka-distract lang ang sobrang kaputian ni Kylie na mala-labanos at flawless talaga! Mahirap magmukhang mahirap at api-apihan. Kailangan niyang magpa-tan nang kaunti dahil hindi maka-relate ang viewers sa mga mestiza actress.

One thing na namana ni Kylie kay Robin ay ang lakas ng loob, determinasyon at dedikasyon sa trabaho.  Ito ang mga katangiang hindi taglay ni Queenie!