Cristine apektado ang mga iniindorsong produkto

Mula sa pahayagang Aksyon

WHAT’S THE POINT?

Pilar Mateo  

WALA pa rin daw sagot ng kalinawan mula sa manager ng nagkakaalitang magkapatid sa kasalukuyan na sina Ara Mina at Cristine Reyes. Kung paano ba nila sisikaping mailagay sa ayos ang nagbunga ng pagdedemanda ni Ara laban sa kanyang kapatid.

            Hindi kasi naisip ng pakiwari niya eh, matalino siya -- dahil tinawag nga niyang bobo ang Ate niyang si Ara, na si Cristine na ang laki ng perhuwisyo nito lalo na sa takbo ng kanyang career ngayon.

            Hindi niya naisip na ngayong ipinagmamalaki niyang maraming endorsements na papasok sa kanya -- may mga alituntunin din sa mga advertisers na kinakailangang maayos ang takbo ng image o career ng kanilang kinukuha para magpalaganap ng kanilang mga produkto.

            Paano kung mag-pull out ang mga advertisers na ito na kumuha sa kanya?

Maski naman ‘ata papel niya bilang isang product endorser eh, hindi maliwanag kay Cristine.

Na hindi lang ganda ng mukha o ganda ng hubog ng katawan ang basehan para kunin ang isang artist to endorse a product.

            Kasama rin dito ang kredibilidad ng isang mag-e-endorso ng produkto.  At higit sa lahat eh, ang kanyang imahe.  Or else, paano maniniwala ang mga tao sa ‘yo.

            Hindi niya naisip ‘yun?

 * * *

INALAM namin kung ano ba ang katotohanan sa nasulat na diumano’y pagwo-walk out ni Gretchen Barretto sa set ng kanyang bagong soap sa ABS-CBN na “The Princess and I”, kung saan kasama niya sina Kathryn Bernardo, Albert Martinez, Lara Quigaman, Allen Dizon at marami pa.

Ayon sa aming nakausap, wala naman daw ganoong insidenteng nangyari na nag-walk out sa sarili niyang show ang aktres.

Sabi ko pa nga, baka naman nagtatakip lang sila para hindi na lang maging nega ang dating.

Pero, pinatunayan naman sa amin ng aking kausap na walang ganoong insidenteng nangyari.  At ang nasabi nito sa amin, baka naman kinailangan na lang talagang umalis ni Gretchen kasi nga, alam naman ng staff na may cut-off ang oras ng taping nito.

So, parang finished or not finished, pass your papers ang takbo?

Kaya, kung ganoon man ang nangyari, sasang-ayon naman kami dahil kung ‘yun ang pinagkasunduan sa magiging oras ni Gretchen -- kung kailangan naman na umuwi na siya eh, dapat naman talagang sinusunod ito.

Unless, libre pa ang time niya at mapapagbigyan pa niya kung kailangan pa nitong mag-stay.

Hindi naman mga makina ang mga tao.  May sukdulan din ang kayang gawin ng katawan.  At sa pagkakaalam ko, early sleeper nga ang La Greta.  At kasama ‘yan sa beauty regimen niya.

* * *

MARAMI na sa atin ang pamilyar sa “Himig Handog.” Ito ‘yung kauna-unahang multimedia songwriting competition sa bansa na tumutuklas sa mga bagong de-kalibreng  kompositor ng mga awiting tiyak na papatok sa panlasa ng sambayanan.

            Kaya balik-eksena ito ngayong 2012 sa pamamagitan ng ika-limang “Himig Handog.”  At muli, mabibigyang pagkakataon na namang kumislap ang bituin ng mga amateur at professional Pinoy songwriters here and abroad.

Sa pamamagitan ng kanilang natatanging husay sa paglikha ng kanta mula sa iba’t ibang genre ng musika.

            Ang “Himig Handog” na unang inilunsand noong 2000 bilang pagbibigay pugay sa mga bagong bayani’ng OFWs (Overseas Filipino Workers) ay muling ihahatid ng ABS-CBN.

Dubbed as “Himig Handog sa Bayaning Pilipino” nung una, sinundan ito ng “JAM: Himig Handog sa Makabagong Kabataan 2001” para naman sa pagdiriwang ng lakas ng kabataang Pinoy.

At noong 2002 at 2003, love songs naman ang ibinida sa pamamagitan ng “Himig Handog Love Songs 2002 at 2003”.

            Ang mga interesadong sumali ay maaari nang magsimulang bumuo ng kanilang love song entries dahil nalalapit na ang official announcement ng mechanics para sa “Himig Handog 2012."