Dingdong umasang mananalo sa ‘9th Golden Screen Awards’

Mula sa pahayagang Aksyon

Whats The Point?
Ni Pilar Mateo   

ANG laki talaga ng galit ng mga naungusan ni Dingdong Dantes sa kanyang naging nominasyon sa inaaway pa at patuloy na sinisiraang ENPRESS (Entertainment Press Society), Inc. na taunang nagbibigay ng Golden Screen Awards.

Nominado kasi si Dingdong para sa Best Performance in a Leading Role for Drama at katunggali niya ang kapwa rin niya mahuhusay na sina Aga Muhlach, John Wayne Sace, Martin delos Santos, Paulo Avelino at Sid Lucero.

Si Aga ang nagwagi.  At being the gentleman that he is at may breeding at pinag-aralan namang tao, dumalo sa gabi ng parangal si Dingdong kahit pa panay ang mga batikos sa kanya ng mga pilit talagang hinaharang ang nominasyon niya bilang isang mahusay na aktor.

Nagprisinta pa ng award si Dingdong.  At noon pa naman, sinasabi na nito na manalo man o matalo siya eh, dadalo siya sa aming awards night.

Ngayon, gusto namang palabasin ng mga galit kay Dingdong at pati ang publicist nito na si Rose Gaccia eh, idinadamay pa at pinepersonal na kaya raw dumalo si Dingdong eh, umaasa na siya ang mananalo.

Lahat ng nominado eh, inaasahang dumalo sa isang awards night.  Kaya, tama ang paningin ng mga nalalagay sa ganoong sitwasyon na manalo man o matalo sila eh, dadalo pa rin sila.

Sa Golden Screen Awards, madalas mangyari 'yan.   Dati pa nga, meron na kaming ginagawang Nominees' Night.  At kahit wala kaming producer, naidaraos namin ito para doon ibigay ang certificates ng mga nominees na dumadalo pa rin hanggang sa mismong gabi na ng awards night.

'Yun naman ang tama.  Hindi 'yung dadalo lang sa awards kung sigurado ng siya na ang mananalo ang isang artista.  

At lagi na, ganito ang ginagawa ng Golden Screen.  Ilang pagkakataon nga na may winner na hindi nakakadalo sa amin. Pero ang ibang nominado eh, nandoon.

Wala rin sa diksyunaryo ng Golden Screen na kung hindi makakadalo ang mananalo eh, papalitan ang winner.

Nakakatawa nga ang kuwento ng ENPRESS member na si Ronnie Carrasco.  Actually, nagtaray na ito sa kanyang column.  Dahil sige raw ng kakatawag at kaka-text sa kanya ang isang umaatake sa ENPRESS at Golden Screen Awards.

Kasabi-sabi ba naman daw eh, hindi niya alam na member pala ng ENPRESS si Ronnie. Basta, ibang klaseng buweltang pagtataray ang ginawa ng aming kasama sa ENPRESS.

Pati naman ang nasa ibang samahan o organisasyon eh, nakikisali pa sa gulong hindi na dapat nila sinasawsawan.  Dahil nagbibigay din sila ng sarili nilang awards kaya dapat na du'n na lang sila mag-focus.

Sabi nga ng katotong Dinno Erece, kitang-kita naman ang pagsasabi niya ng opinyon niya tungkol pa rin sa nominasyon na siya nga itong biased at alam mong may nag-utos o nagpa-sulat lang sa kanya nito.

Haharapin na lang daw ni Dinno ang nagsulat ng nasabing isyu tungkol sa nominasyon. Sasabihan na lang daw niya ito na 'wag na pakialaman ang ENPRESS o Golden Screen Awards dahil miyembro naman siya sa isa pang award-giving body.

Hindi naman daw pinapakialaman ng ENPRESS ang pagbabayad nito sa mga waiters sa mga presscons para lang may maipabalot siya o maipauwing pagkain tuwi na lang a-attend siya ng presscon.

Ultimo mga props sa mga mesa ng dinadaluhang presscon eh, tinatangay daw nito.

Ganito ba ang klase ng awayang gusto nating mamayani sa paligid natin?

 Sa anumang gulo ng ibang organisasyon, hindi nakikialam ang ENPRESS o Golden Screen kaya sana, ganito rin ang gawin ng iba.

Eh, kung ako naman ang magsasalita tungkol sa taong ito na gusto pang makisawsaw sa pang-iintriga na sa ENPRESS, baka bumalik ang mga kuwento nung maging treasurer ako sa nasabing samahan.

Kaya, bago nagsasalita-mag-isip-isip muna.  At baka ang duming gustong ikulapol sa ENPRESS o mga miyembro nito eh, bumuwelta sa kanya a thousand-fold.

Alalahanin, sa panahon ng kalamidad, walang ipinagkait na tulong ang members ng ENPRESS sa sinapit niya.  Hindi niya kinailangang manghingi.  Ni hindi tiningnan kung saan siya kabilang.

Hindi kami ang tipong nanunumbat.  Pero may mga pagkakataong para lang maipaalala sa mga taong nakakalimot na nawawala siya sa lugar kung saan siya dapat na tumayo o kumampi eh, masasabi ang mga naganap na at nagaganap pa.

Tapos na ang aming awards, pinili na ang mga nanalo.  Masaya ang lahat sa naging resulta. Pa-move on na kami sa aming 10th year!

At gaya ng lagi naming sinasabi, we stand by our choices.  Wala ng pakialaman.  Amin ito.  Du'n kayo sa inyo.  O gumawa kayo ng sa inyo!

* * *

NAKAUSAP namin sa presscon ng "Moron 5 and the Crying Lady" ang nagtamo ng Best Perforamnce by an Actor in a Supporting Role-musical or comedy (ka-tie si Edgar Allan Guzman) na si Martin Escudero (for his role in "Zombadings: Patayin sa Syokot si Remington").

Dahil isa siya sa limang bida na ang karakter eh, bobo sa pelikula, sa kanya natoka ang pangalan ng matatalinong tao na sina Michaelangelo (ang pamoso'ng pintor) na ang apelyido eh, Marcos.

"Kelan ko nga lang po nalaman.  At natuwa naman ako na Marcos pala ang apelyido ng karakter ko.  Baka nga hindi pa ako buhay nung time na namuno siya.

“Pero sa mga nabasa ko naman po at napag-aralan, pati na rin sa sinabi sa akin ng family ko eh, may magaganda rin naman siyang nagawa para sa ating bayan.

“Gusto ko siya dahil napakatalino niya.  Gusto kong sundan ang tamang yapak niya. 'yung mabuti at tuwid na daan."

Along the course of our interview, napag-alaman naming nasa agenda pala ni Martin ang balang-araw eh, pagtakbo rin sa pulitika gaya rin ng mga kamag-anakan niyang sumabak na dito.

"Nasa plano ko naman po.  Matagal na 'yun pero ngayon pa lang, sinisimulan ko na nang paunti-unti kahit nasa showbiz ako 'yung makatulong na sa mga kababayan ko sa Cavite. Ang maglingkod sa kanila in my own way.

“Kaya, gusto ko rin po na kahit paunti-unti matapos ko ang pag-aaral ko."

Tama 'yan!