Ara tinawag ni Cristine na bobo, pokpok at aborsyonista

Mula sa pahayagang Aksyon

WHAT’S THE POINT?

Pilar Mateo  

Cristine sinampahan ni Ara ng kasong Libel at Grave Coercion

ANG statement ng aktres na si Ara Mina matapos nitong magsampa ng kasong libel at grave coercion sa kanyang kapwa rin artistang kapatid na si Cristine Reyes:

“Ako po ngayon ay nagsampa ng kasong Libel at Grave Coercion laban sa aking kapatid na si Cristine Reyes.

“Ang aking layunin sa kasong ito ay turuan ng leksyon ang aking kapatid na si Cristine.  Matagal akong nagtimpi at nagpasensya sa ginagawang paninira, pambabastos, panghihiya,  at pananakot sa akin ng sarili kong kapatid na si Cristine.

“Pero labis-labis na pasakit na ang idinulot sa akin ni Cristine.  Natatakot ako na kung kaya niya itong gawin sa akin, na kanyang sariling kapatid, mas lalo niyang kayang gawin ito sa ibang tao. 

“Kaya nag desisyon na ako na kasuhan siya para maturuan sya ng leksyon na mali ang ganitong mga gawain.

“Mahal ko ang kapatid kong si Cristine.  Pero bata pa siya at tila hindi pa niya naiintindihan ang halaga ng respeto, paggalang, at pagmamahal sa kapatid, magulang, kaibigan, at sa ibang tao. 

“Dumarating talaga ang panahon na kailangang paluin ang isang bata para matuto ng tama.  Ako ay naniniwala na walang ibang magtuturo at magmamalasakit sa aking kapatid na si Cristine kundi kaming mga malapit sa kanya.

 “Sana lang, hindi pa huli ang lahat para matutunan niya ang kanyang mga nagawang pagkakamali at magbago na siya ng ugali.  Uulitin ko, mahal ko ang kapatid kong si Cristine.  Ito lang ang naisip kong paraan para matigil na ang ginagawa niyang paninira, pambabastos, panghihiya,  at pananakot niya sa akin.”

Katakut-takot na luha ang bumuhos mula sa aktres na si Ara nang i-file na nito ang kanyang reklamo laban sa kapatid sa sala ni Assistant City Prosecutor Ramoncito Bienvenido T. Ocampo, Jr. kasama ang kanyang mga abugado na sina Atty. Ricky dela Cruz, Atty. Marforth Fua at Atty. Priscilla Marie Abante.

 Maraming ginulat si Ara, kasama na nga kami ni Leo Bukas na pawang publicists niya. Nang malaman nga namin ang tungkol sa nasabing move, tinanong pa muna namin ang aktres kung baka nabibigla lang siya at baka puwedeng pag-usapan na lang nila ito, bilang problema sa pagitan naman ng magkapatid ito.

Pero nang mabasa na namin ang nilalaman ng complaint-affidavit ni Ara kung saan nga nakasaad ang mga text messages sa kanya ng nakababatang half-sister, hindi mo sisikmurain ang mga pinagsasabi ng mino-molde para maging ehemplo ng mga hahanga sa kanyang si Cristine.

Maliwanag na pambababoy at kawalan ng respeto ang nilalaman ng mga ipinadala nitong text messages, hindi lang kay Ara kundi pati na sa mga taong malalapit dito, gaya kay Mayor Patrick Meneses at ina ng huli na nagsampa rin ng kanilang reklamo kay Cristine.

Kulang na nga lang eh, patayin ng mga salita ni Cristine sa kanyang mga mensahe ang Ate niyang parang walang nagawang maganda para sa kanya.

Tinawag niyang pokpok si Ara, bobo, laos, masama ang ugali, nakakadiri, ikinakahiya niya, pa-sosyal, aborsyonista at marami pa.  At ang pinag-uugatan eh, ang pagsingil ni Cristine ng naging hati niya sa binili nilang bahay ni Ara para sa kanilang ina, na nagkakahalaga ng P3,300,000.00 -- kung saan nag-down ng isang milyon si Cristine at pinunan ni Ara ng P2,3000.000 in monthly installments.  Na natapos noong November 30, 2011.

Kaya noong Marso ng 2012, sinisingil ni Cristine kay Ara ang isang milyon na ibinayad niya para sa bahay, kung saan kay Cristine naman nakapangalan. Kaya, kung hindi raw maibibigay ni Ara ang nasabing halaga eh, ang sasakyan na lang nitong GMC ang ibigay kay Cristine.  Na ang nasabing mga text messages na nga ang naging bunga nang hindi pumayag si Ara dahil wala naman nga raw siyang utang bale kay Cristine.

Sa mga ginagawa ni Cristine, hindi nito nare-realize ang noon pa man eh, gabundok nang sama ng loob na ipinapakimkim niya sa kanilang ina at iba pang miyembro ng kanilang pamilya na pinagsalitaan niya rin ng hindi maganda.

Defamatory at malicious messages ang mga ito.  Kaya, bago magsipag-judge ang mga nakapanood sa pag-iyak ni Ara sa mga interviews sa kanya na inilabas sa mga news programs, alamin muna ang puno’t dulo ng lahat.

Lahat ng tao sa tabi ni Ara, kung anu-ano ang sinasabi ni Cristine, including me and Leo na publicists ni Ara.

Tawagin mo kaming cheap reporters, Cristine?  Sino ba sa ating dalawa ang may pinag-aralan?  Ang natuntungan mong pag-aaral eh, galing sa pagpapawis ng kapatid mo, na hindi mo naman naipagpatuloy at hindi mo naman ginagamit.  Mag-ingat-ingat ka sa pagsasalita mo sa amin, ha?

 Dapat, magsisi ang manager mo sa pagkupkop niya sa ‘yo.  Sisirain mo lang sila.  At ano ang ipinagmamalaki mo -- na magkakaroon ka ng malalaking endorsements?

There should be truth in advertising.  Kaya ang mga kukuha sa ‘yo to endorse, dapat na pag-aralang muli kung tama ba na taglayin mo ang pangalan ng kumpanya at produkto nila sa mga ginagawa mo sa ngayon.

Ang lahat ng ginagawa mong ito sa pamilya mo, babalik sa ‘yo.  Ang bilis mo namang makalimot.  Nung matanggal ka agad-agad sa “Starstruck” ang Ate mo ang unang tumakbo sa tabi mo para i-comfort ka!  

Nang muntik ka nang mamatay dahil sa Ondoy, hindi tumigil ang Ate mo para makahanap ng sasagip sa ‘yo sa ibabaw ng bubong ng bahay niyo.

Ang sama-sama ng ugali mo.  Noon pa naman, nakita ko na ‘yan sa ‘yo.  Pero Ate mo pa rin ang nakiusap na intindihin ka.  O, ano ang napala niya?  Bite the hands that feed you?

Kung sa akala mo, ang taas mo na, wala ka namang ibang pupuntahan, ‘di ba?  Bababa ka rin.  Baka nga hindi lang baba kundi lagapak!

Mga bumuhay sa ‘yo hindi mo nga iginagalang, kami pa! Bahay para sa nanay mo-binabawi mo ang ibinayad mo.  At ano 'yung sabi mo, kinuwestiyon mo kung hanggang kelan ka tatanaw ng utang na loob sa nanay mo?  Saan ka ba nanggaling?

Ito ba ang iidolohin niyo? 

Siguro, kaya ganyan ka, ni hindi mo kilala ang Diyos.  Nakakaawa ka naman!