Angel, Lovi at Anne sa Best Actress maglalaban-laban

Mula sa pahayagang Aksyon

CHIZBIZ

Ni  ERLINDA RAPADAS

DAHIL sa matitindi at mabibigat na pelikulang kanilang ginawa noong 2011 posibleng sina Lovi Poe, Anne Curtis, Carla Abellana at Angel Locsin daw ang maglalaban-laban at magtutunggali sa Best Actress Award sa darating na awards season sa movie industry.

Sina Lovi at Carla nagmarka sa moviegoers ang kanilang role sa “My Neighbor's Wife.” Iba rin ang akting na ipinamalas ni Lovi sa “Aswang,” “Temptation Island” at “Yesterday, Today & Tomorrow.”

Ganoon  rin naman si Carla na bukod sa “My Neighbor's Wife” ay napansin rin sa “Asiong Salonga” movie at sa “Yesterday, Today & Tomorrow.”

Samantala marami ang bumilib kay Anne sa kanyang  markadong role sa “No Other Woman.” Si Angel nagpaka-daring rin sa pelikulang “In The Name Of Love” katambal si Aga Muhlach with Jake Cuenca.

Sa hanay ngayon ng mga young actress, sina Lovi, Carla, Anne at Angel ang kinakitaan ng husay sa pag-arte at magtatagal sa showbiz, lalo na't bukod sa pelikula ay may mga TV shows rin sila.

Tulad ni Lovi na major cast at bida sa “Legacy” at nagmarka ang kanyang pagganap bilang si Natasha Alcantara!

* * *

BIKTIMA si Rhian Ramos ng maling pag-ibig sa isang lalaking nagwasak ng kanyang reputasyon at walang respeto sa babae.

Napakabigat ng dapat na pagbayaran ni Rhian para lamang matutunan ang isang makabuluhang leksyon sa buhay.  At taas noo niyang hinarap ang masasakit na akusasyon sa kanya ng lahat.

Pikit-mata niyang tinanggap ang mga panlalait at paninira sa kanyang pagkatao.  Hindi siya nagpatalo sa pagsubok ng buhay dahil na rin sa pagmamahal at moral support ng kanyang pamilya, mga kaibigan at Kapuso Stars.

Muli, nakikita namin ang maaliwalas na aura sa mukha ni Rhian.  Natapos na niya ang pelikulang “My Kontrabida Girl” with Aljur Abrenica.

Comedy ang movie at hindi kontrabida ang role dito ni Rhian.  Kaya naman pakiusap ng mga tagahanga ni Rhian Ramos sa mga haters/detractors ng tisay na Kapuso Star (na leadstar sa pelikulang “My Kontrbida Girl” at kasama rin sa “The Road”) na tigilan na ang paninira sa young actress.

Gusto ring umapela at makiusap ng mga supporters ni Rhian sa entertainment writers upang tuluyan na raw maka-move on at makapagsimulang muli sa kanyang career ang kanilang hinahangaang Kapuso Star.

Kung may nagawa mang kasalanan at pagkakamali si Rhian dahil sa sobra niyang pagmamahal at tiwala sa isang lalaking nagsamantala sa kanyang kainosentehan, sana raw ay mabigyan ng chance si Rhian na maituwid ang kanyang mga pagkakamali.

Ituring man siya ng marami na isang Magdalena, ang babaeng makasalanan na dapat libakin at parusahan, deserve pa rin naman ni Rhian Ramos na mabigyan ng panibagong pagkakataon uang maka-move on pagkatapos ng kontrobersya at iskandalo sa kanyang buhay!

* * *

WALANG nasasayang na oras  kay Marvin Agustin kaya successful siya ngayon.  Kahit anong oras niya gustuhing mag-retire sa pag-aartista ay financially stable na siya.

He’s a silent millionaire kaya hindi na dapat pagtakhan kung can afford rin siyang mag-produce ng TV show sa TV5, ang “Kanta Pilipinas” na in full swing na ang pag-a-audition nationwide.

Si Marvin Agustin ang tumatayong producer ng show kaya nabalita rin na pipirma siya ng kontrata sa Kapatid network.

At kahit abala si Marvin A sa maraming bagay, paglalaanan raw niya ng oras at panahon ang pagpo-promote ng pelikulang “The Road” na ipalalabas sa U.S.A. sa Mayo.

Mismong si Direk Yam Laranas na nagsabing kasama sina Marvin, Alden Richards at Rhian Ramos sa US trip para sa “The Road.”

 Halos dalawang dekada na sa showbiz at nakapagpundar na rin ng mga negosyo si Marvin.  Successful din ang kanyang pagpo-produce ng concert ng mga foreign artists na kinukuha niya para mag-concert sa malalaking venue tulad ng Smart Araneta Coliseum.

May mga kasosyo si Marvin Agustin sa bawa't negosyong kanyang pinapasok.  Siya lang madalas ang naka-front sa meetings at negosasyon.  Kaya ang alam ng  lahat ay major partner at owner siya ng negosyong kanyang binubuksan.

Masinop sa pera at sobrang sipag ni Marvin Agustin sa pag-aasikaso ng kanyang mga negosyong karamihan ay resto at food business.

Kahit nasa teyping or shooting siya naisisingit pa niya ang pagsu-supervise sa mga ito.

* * *

BIG break kay Alden Richards ang pagkakapansin sa kanya sa pelikulang “The Road” ng GMA Films.  Nagbunga rin ang kanyang tiyaga at pagsisikap upang magig ganap na aktor.

Kinakitaan ng masidhing determinasyon si Alden kahit noong nagsisimula pa lang siyang gumawa ng pangalan sa showbiz.

Nagsimula siya sa pagsali-sali noon sa pageants at contests sa Sta Rosa, Laguna.  Taong 2009 nang pinalad si Alden Richards na manalo at tanghaling Ginoong Sta Rosa.

Dito rin niya na-meet at nakilala ang ilang showbiz celebrities na tumulong sa kanya bago siy napadpad sa Kapuso netork.  

Ngayon ay makinang na ang bituin ni Alden.  Pero, pressure kay Alden kapag sinasabi ng ilang entertainment writers na siya ang John Lloyd Cruz ng GMA-7.  Hindi lang kasi "good looks" ni JLC ang dapat na pantayan ni Alden pati ang galing umarte at pagiging box-office king ng aktor ay makuha ni Alden.

Nakakakaba ang ganito kataas na expectation sa kanya lalo na ngayong napansin ang kanyang pagganap sa "The Road" ng GMA Films.

Ang pelikulang ito na dinerek ni Yam Laranas ay nakatakdang ipalabas sa 50 (fifty) commercial theaters sa U.S.A. at Canada.

Ang FREESTYLE Releasing Entertainment ang mamamahala sa pagre-release ng "The Road" abroad.

May gagawing red carpet premiere ng “The Road” sa May 9 sa Mann Chinese Theater at dadaluhan ng mga artistang kasama ditto tulad nina Rhian Ramos, Marvin at Alden.