Jaclyn Jose Cannes Film Festival 2016 Best Actress!

Watching Machine

ni Gas Gayondato III

ISANG napakalaking karangalan ang natanggap ni Jaclyn Jose nang tanghalin siyang Best Actress sa katatapos lamang na 69th Cannes Film Festival na ginanap sa Cannes, France, noong Linggo, ika-22 ng Mayo, para sa kanyang natatanging pagganap sa pelikulang “Ma Rosa” bilang isang inang napilitang magbenta ng droga alangalang sa pamilyang pilit lumalaban sa pagkakalugmok sa kahirapan.

“I don’t know what to say, I am so surprised,” maluha-luhang sambit ni Jaclyn habang tinatanggap ang kanyang Best Actress award. I just went here to walk on the red carpet with my daughter. Thank you to Cannes, thank you so much. Thank you to the jury. Thank you for liking our film.”

Pinasalamatan din ni Ms. Jose ang kanyang director na si Brillante Mendoza.  Sinusunod lang daw niya kung ano ang ipinapagawa sa  kanya ng kanyang direktor. “He is such a brilliant director – a genius in the Philippines, and now, here in your country,” aniya pa.

Inialay din ng aktres ang kanyang tagumpay sa mga Pinoy na naroon nung gabing yun, sa kanyang anak na si Andi Eigenmann,  sa ating mga  kababayan, at sa Pilipinas.

Ang “Ma Rosa” ay isa lamang sa 20 kalahok sa prestihiyosong Cannes Film Festival.  Tinalo lang naman ni Jaclyn ang mga kilalang international stars na sina Charlize Theron para sa “The Last Face” ng United States at Marion Cotillard para naman sa “Mal de Pierres” ng France. Si Jaclyn rin ang kauna-unahang Pinoy at mula sa Timog-Silangang Asya na nanalong Best Actress sa Cannes.

At dahil diyan, ngayon ay kahanay na si Jaclyn ng mga past winners ng Cannes na sina Juliette Binoche, Helen Miren, Bette Davis, Rooney Mara, Julianne Moore at Meryll Streep.

* * *

WAGING-WAGI naman ang Power Duo sa katatapos lang ding “PGT Season 5 Finals” na ginanap sa Mall Of Asia Arena noong nakaraang Linggo, ika-21 at ika-22 ng Mayo. 

Ang Power Duo ay binubuo ng real-life couple na sina Anjanette at Gervin ng Angono, Rizal.  Nagsimula sila sa PGT 5 bilang magkaibigan hanggang sa humantong sa kanilang pagdi-date.

Labing dalawang grand finalists, na lahat ay pawang magagaling, ang naglaban-laban upang masungkit ang prestihiyosong PGT 5 Grand Winner title at 2 milyon pisong cash prize.

Walang kaduda-dudang nag-level up nang husto ang Power Duo sa kanilang walang kasing gandang performance na nag-uumapaw sa tunay na pag-ibig nila sa isa’t isa.  Ang Power Duo ay tunay po namang matatawag na poetry in motion.

Gusto ko rin ang performance ni Amazing Pyra dahil talaga namang nakaka-amaze ang  fire power na kanyang ipinamalas.  

Sayang UA Mindanao dahil isa ang grupo nila na shoo-in upang tanghaling PGT 5 Grand Winner dahil sa kanilang makapigil-hininga at death-defying stunts kung hindi lang sila sumablay sa kanilang ultimate pasabog kung saan ang rider ay babagsak dapat nang patalikod.  

Sa kasamaang palad ay di na nito nakontrol ang sinasakyang motorsiklo na naging sanhi ng kanyang maling pagbagsak.  Awa ng diyos ligtas naman ang rider pero naka-wheelchair na pagbalik ng stage.

Tinalo ng Power Duo ang 11 grand finalists: Crossover Family, The Chosen Ones, Kurt Philip Espiritu, Dino Splendid Acrobats, si Ody Sto. Domingo, Next Option, Amazing Pyra, Mastermind, UA Mindanao, Power Impact at ang Sto Tomas Bulilit Generation.

Kasama ng Power Duo sa Top 3 ang close-up magician na si Ody Sto Domingo at si Amazing Pyra.  Ang mga hurado ay binubuo nina Robin Padilla, Angel Locsin, Vice Ganda at dating ABS-CBN Vice-President Mr. Freddie Garcia.  Sina Luis Manzano at Billy Crawford ang nagsilbing hosts ng PGT Season 5.