Lloydie at Shaina split na?

SHOWBITZ & PIECES

VINIA VIVAR

NAKATSIKAHAN  namin sa presscon ng “Aryana” ang leading man ni Ella Cruz sa serye na si Paul Salas na unti-unti nang sumisikat ngayon at mukhang magiging another matinee idol in the future.

        Ang gusto raw niyang sundan ang yapak at idol daw niya ay si Dingdong Dantes na tito niya in real life.  Pinsan ng nanay niya ang aktor kaya kung mapapansin n’yo ay kahawig din niya ito.

        “Kasi noon pa, sinasabi niya sa akin na “nakikita ko, may future ka, huwag maging mayabang, ganyan.”  Tapos sabi niya, andito lang ako as tito mo, ganyan.”

        Maraming pangarap si Paul kaya gustung-gusto raw niya talagang magtagumpay sa kanyang karerang pinasok.  Dream niyang makabili ng Porsche kapag malaki na ang kanyang kinikita.

        Paul is only 14 kaya kung magtutuluy-tuloy ang maganda niyang career ay hindi malayong mabili niya ang dream car in no time at all.

        Dahil partner niya si Ella sa Aryana, ngayon pa lang ay marami na ang tumutukso sa kanila lalo pa nga’t araw-araw silang magkakasama at hindi malayong ma-develop sa isa’t isa.

        Pero say ni Paul ay mga bata pa raw sila, si Ella ay 15 lang daw at wala pa raw sa isip nito ang pakikipag-boyfriend at ganu’n din naman daw siya.

        “Friends lang po kami ni Ella, simula pa nung bata kami, magkaibigan na kami,’ nakangiting sabi ni 

 Paul. 

                                                                             * * *

 INAMIN daw ni Derek Ramsay sa ilang entertainment press na nag-interview sa kanya last Sunday pagkatapos siyang koronahan bilang Box-Office King sa “43rd Box-Office Entertainment Awards” ng Guillermo Mendoza Memorial Scholarship Foundation, Inc na may problema sila ng girlfriend na si Angelica Panganiban.

        Ayon sa aktor ay may pinagdadaanan sila ni Angelica at inaayos nila ito ngayon.

        Kasabay naman nito ang tsismis na nagkakamabutihan daw sina Angelica at John Lloyd Cruz na kasalukuyang nasa Vietnam ngayon at nagsu-shooting ng movie.

        Kasabay pa rin nito ang balitang split na rin daw sina Loydie at Shaina Magdayao.

        Wala pang pahayag sina Angel, Shaina at Loydie sa issue and for sure,sa pag-amin ni Derek na may problema nga sila ng girlfriend, mas lalong lalaki ang intriga.

 * * *

KASAMA rin sa “Aryana” si Pokwang at ginagampanan niya ang role na ina ng sirenang si Ella Cruz.  Ayon sa komedyana, sobrang nakaka-relate siya sa kanyang papel dahil in real life ay naranasan din niya ang mawala sa kanyang anak.

“Sobrang lapit sa akin ng role, isang nanay na nawalay sa kanyang anak.  May mga linyang pag binabasa ko pa lang, nadudurog na ako,” she said.

            May eksena nga raw siya rito na muntik na niyang hindi kayanin dahil sa sobrang sakit.

    “’Yung hindi kami kinikilala ni Tonton (Gutierrez na gumaganap na kanyang asawa), kung baga, umiiwas na si Tonton sa akin, hindi niya kinikilalang anak namin si Aryana, ayaw niyang maniwalang anak namin.

“’Yung sa akin kasi, di ba, ‘yung mga anak ko, parang abandoned child (sic) din, so, ang sakit naman ng ganito, di ba?” pahayag pa ni Pokwang.

Natanong din si Pokey kung bakit blooming siya ngayon at say niya, “Sa make-up.”

            Wala bang love life?

“Wala,” sagot niya. “Pero masaya naman ako sa buhay ko.  Eh kasi, lagi lang naman ako sa bahay.  Pag walang trabaho, sa bahay lang ako kaya paano ako makakakilala ng Papa?”

Hindi naman daw siya nalulungkot kahit wala siyang Papa dahil may anak naman daw siyang nagmamahal sa kanya.  Okay lang daw sa kanya kung nakatalaga siyang maging single forever.

            Samantala, sa May 7 na magsisimula ang “Aryana” sa primetime slot ng ABS-CBN.